إنت مريض سكر
ينفع تاكل من الأكل ده؟

أنا فاهم كويس -كمريض سكر – إن السؤال ده نتيجة لقصص كتير عن قائمة الممنوعات علي مريض السكر والتحذيرات العنيفة: إياك تاكل مكرونة و رز و عيش وابعد عن الحلويات طبعا

محشي ؟ انت أكيد إتجننت

وحاجات كتيرة من هذه النوعية كلها مستندة إلي القاعدة العلمية الشهيرة “بيقولك” المسيطرة علي حياتنا و حتي علي كثير من أطباء مرضي السكري

الفكرة العامة هي :

مفيش قائمة ممنوعات – ده كل حاجة ممنوعة أصلا
ممكن أكتب لك قائمة المسموحات : خضار – خضار مسلوق – خضار سوتيه – فراخ مشوية

من ناحية تانية – شركات الأعذية والأكل والمشروبات  انتهزت الفرصة دي وعملوا تسويق وترويج للأكل صديق مريض السكر Diabetes Friendly  ويتسوق لها بعنف عند مرضي السكر واللي عاوزين يخسوا  واللي عايزين لاف ستايل … الخ وفي الحقيقة ده بيزود الأقاويل اللي بتسيطر علي عقولنا

إيه أفضل أكل لمريض السكر

نفس الأكل العادي بتاعك و بتاع أهلك
نفس الأكل العادي بتاع أصحابك و زمايلك في الشغل
المناقشة مش هتاكل إيه – الموضوع كله إنه مطلوب مننا نزود مستوي الوعي والادراك  إحنا بناكل إيه؟  إمتي ؟

معدل التمثيل الغذائي

معدل التمثيل الغذائي BMR اللي هو اختصار  Basal Metabolic Rate  كلام كبير أوي يصعب علي أمثالي فهمه – وأنا كل اللي عندي في دماغي خلية واحدة بس – يعني إيه الكلام التخين ده

معناه : تحديد عدد السعرات الحرارية التي يجب استهلاكها يوميًا – مع الأخذ في الإعتبار مستويات النشاط على مدار الأسبوع

شوف بقي يا سيدي

إذا كانت طبيعة عملك قاعد في المكتب طول الوقت و بتركب عربيتك ، ومفيش جيم  … يبقي ببساطة مش محتاج سعرات حرارية كتيرة ، وبالتالي مش محتاج أكل كتير وإلا تحولت إلي بطة بلدي مصابه بالترهل ومريضة سكر

إذا كانت طبيعة عملك فيها مجهود عضلي و مشاوير مشي علي الرجلين و بتروح الجيم كمان … سيقي ببساطة محتاج سعرات حرارية كتيرة ، وبالتالي محتاج أكل كتير علشان ماتتحولش إلي هيكل عظمي ومفيش قدرة علي أي مجهود

تذكر

أولا : محتاج تتابع مع دكتور بيفهم – مش دكتور حافظ

ثانيا : الأكل هو الأكل – والأكل ده رااائْع  فاستمتع أوي